“AzerGold” QSC-nin rəhbərliyi bəyan edir ki, Cəmiyyət öz ekoloji siyasətində əlvan metal filizi yataqlarının öyrənilməsi, tədqiqi, kəşfiyyatı, işlənməsi və idarə olunması zamanı ətraf mühitin qorunması və təbii ehtiyatlardan dayanıqlı inkişaf prinsiplərinə uyğun şəkildə istifadəni əsas götürür. Cəmiyyət həmçinin öz fəaliyyətində:

• Təbii ehtiyatların mühafizəsi ilə bağlı respublikamızın tərəfdaş çıxdığı beynəlxalq müqavilə və konvensiyaların şərtlərinə (sazişlər, protokollar və s.), və eyni zamanda yerli qanunların tələblərinə riayət edir;
• Ətraf mühitin çirklənməsinin minimuma endirilməsi və mühafizəsinin tənzimlənməsi məqsədilə dayanıqlı inkişaf prinsipləri üzrə mütərəqqi üsulları tətbiq edir;
• Ətraf mühitə mənfi təsirin qarşısını alan qoruyucu və qabaqlayıcı tədbirlər görür;
• Fəaliyyət göstərdiyi sahələrdə ekosistemlər üçün yarana biləcək ekoloji riskləri maksimum səviyyədə azaltmağa çalışır;
• Fəaliyyətində Ətraf mühit üzrə İdarəetmə sistemini tətbiq edir;
• Ətraf mühitin qorunması, əhalinin sağlamlığı, təbii ehtiyatlardan səmərəli istifadə sahəsində dövlət, hökumət orqanları və ictimai təşkilatlarla əlaqələrin genişləndirilməsini həyata keçirir;
• Ətraf mühitin mühafizəsinə dair ictimai fəal mövqe nümayiş etdirir;
• Əlvan metal filizi yataqlarının öyrənilməsi, tədqiqi, kəşfiyyatı, işlənmə prosesləri zamanı ətraf mühitə təsirinin davamlı monitorinqini həyata keçirir.

“AzerGold” QSC ətraf mühitin mühafizəsi, ekoloji təhlükəsizliyinin və ekoloji  siyasətin öhdəliklərini yerinə yetirilməsi aşağıdakı əsas mexanizmlər müəyyən edir:

• Ətraf mühit üzrə İdarəetmə sisteminin tələblərinə uyğun olaraq, bu sistemin tətbiqi və habelə tətbiqinin təkmilləşdirilməsi üçün davamlı nəzarət və daxili islahatlar həyata keçirir;
• Ətraf mühitə mənfi təsirin azaldılmasına yönəldilmiş ölçülə bilən ekoloji və korporativ sosial məsuliyyət üzrə hədəflərin müəyyən edilməsi və həmin hədəflərə çatmaq üçün lazımi resursları səfərbər edir;
• Cəmiyyətin ümumi fəaliyyətinin planlaşdırılması və həyata keçirilməsi zamanı ekoloji aspektlərin mütləq şəkildə nəzərə alınması və bu istiqamətdə risklərin qiymətləndirilməsini təmin edir;
• İstehsalat fəaliyyətinin ən mühüm ekoloji aspektləri üzrə müntəzəm monitorinqin keçirilməsi, bu monitorinq nəticələrinin təhlili və bu təhlillər əsasında ətraf mühitin mühafizəsi üzrə Cəmiyyət tərəfindən maliyyələşdirilmiş məqsədli Proqramlar və planlar işləyib hazırlayır: Bu proqramlar prioritet olaraq aşağıdakı sahələri əhatə edir:
  • ətraf mühitə atılan çirkləndirici tullantıların azaldılması;
  • tullantıların yerləşdirilməsi və su obyektlərinin qorunmasına nəzarət;
  • səmərəli şəkildə torpaqdan istifadə və pozulmuş torpaqların keyfiyyətli rekultivasiyası.
• Cəmiyyətin fəaliyyət göstərdiyi regionlardakı fəaliyyətinin ekoloji aspektlərinə aid olan, tətbiq edilən qanunverici və digər tələblərin Cəmiyyətin hər bir işçisi tərəfindən öyrənilməsinin, başa düşülməsinin və təcrübədə tətbiq edilməsi təşviq və nəzarəti təşkil edir;
• Ətraf mühitin mühafizəsi və sənaye təhlükəsizliyinin yüksəldilməsi tələblərini nəzərə alaraq, mövcud texnoloji avadanlıqları və texnologiyaları müasirləşdirmək, bu tələblərə cavab verən mütərəqqi texnologiyaları tətbiq etməklə ekoloji cəhətdən daha az mənfi təsir yaradan materiallardan istifadə edir;
• Resurslara qənaət, enerji məsrəflərinin azaldılması, müasir tullantısız və ya az tullantılı texnologiyaların tətbiqi üzrə proqramlar formalaşdırır, müəyyən olunmuş məqsədlərə çatmaq üçün bu istiqamətdə ildə 1 dəfə olmaqla müvafiq  təhlil  və düzəlişlər həyata keçirir;
• Bu siyasətin öhdəliklərini, Cəmiyyətin obyektlərində çalışan subpodratçılar da daxil olmaqla, bütün əlaqədar şəxslərin diqqətinə çatdırılır.

AzerGold” QSC bütün prinsiplərə əməl etməklə iş prosesi zamanı ətraf mühitə zərər vura biləcək təhlükələrin önlənilməsi və ya minimuma endirilməsi üçün, milli qanunvericilik çərçivəsində bütün uyğun vasitələrdən istifadə etməklə və bütün prinsiplərə əməl etməklə həyata keçirir.

“AzerGold” QSC-nin Keyfiyyət sahəsində siyasəti əlvan metal filizi yataqlarının öyrənilməsinə, tədqiqinə, kəşfiyyatına, işlənməsinə və idarə olunmasına, Cəmiyyətin daxili idarəetmə sistemi sahəsinə, istehlakçıların tələblərinin təmin edilməsinə, habelə podratçılarla və subpodratçılarla əlverişli münasibətlərin saxlanılmasına yönəlmişdir.

“AzerGold” QSC-nin rəhbərliyi bəyan edir:

• Keyfiyyət sahəsində siyasətimiz ümumi inkişaf konsepsiyamızın ayrılmaz hissəsidir;
• bu Siyasət fəaliyyətimizdə qabaqcıl, mükəmməl və ən son texnologiyaların tətbiqini, istehsal etdiyimiz məhsulların rəqabət qabiliyyətinin yüksəldilməsini ön plana çəkir;
• Cəmiyyət istehsal etdiyi məhsulların keyfiyyətinə bütün mərhələlərdə nəzarət edir;
• hazırkı və proqnozlaşdırılan gələcək tələbatların öyrənilməsi məqsədilə istehlakçılarla sistematik işləmək, əməkdaşlığın lazımi qiymətləndirilməsi və onlara diqqətin artırılması bu Siyasətin tərkib hissəsidir;
• Cəmiyyət istehsal sahələrini, təklif etdiyi məhsulların keyfiyyət göstəricilərini beynəlxalq və milli standartlara, Azərbaycan Respublikasının qanunvericiliyinə və normativ qaydaların tələblərinə uyğunlaşdırır;
• Cəmiyyət dağ-mədən sahəsində qabaqcıl beynəlxalq təcrübəyə əsasən proseslərin optimallaşdırılmasına, həmçinin mövcud sistemlərin səmərəliliyinin daim artırılmasına təşəbbüs göstərir;
• Cəmiyyət işçi heyətin bilik, bacarıq və səriştəliliyinin artırılması üçün mütəmadi olaraq təlimlər keçirir;
• Cəmiyyət keyfiyyət sahəsində qəbul edilmiş qərarları rəhbər tutaraq, hazırki və uzunmüddətli dövr üçün strateji inkişaf istiqamətini və hədəflərini nəzərə almaqla keyfiyyəti idarəetmə sisteminin yararlılığının, adekvatlığının və səmərəliliyinin təmin edilməsi məqsədilə dövri olaraq təhlillər aparır və lazımi nəticələrə nail olmaq üçün qabaqlayıcı tədbirlər görür.
• Cəmiyyət bütün proseslərində riskləri və imkanları qiymətləndirir və fəaliyyətində risklərin azaldılması və imkanların çoxaldılmasını ön plana çəkir.

Cəmiyyət mövcud siyasətə əməl edilməsi məqsədilə bütün tələb olunan resursları ayırmağı, əməkdaşların təşəbbüslərini təşviq etməyi, keyfiyyəti artırmağı və səmərəliliyi təmin etməyi öhdəsinə götürür.

“AzerGold” QSC-nin işçilərin sağlamlığının qorunması və əməyin təhlükəsizliyinin təmin edilməsi sahəsi üzrə fəaliyyətində əsas məqsəd bədbəxt hadisələrin, insidentlərin qarşısının alınması və müəssisənin bütün işçiləri, həmçinin podratçılar və subpodratçılar üçün təhlükəsiz iş şəraitinin yaradılmasıdır.

“AzerGold” QSC-nin rəhbərliyi bəyan edir:

• İşçilərin, podratçı təşkilatların işçilərinin və əhalinin sağlamlığına ziyan vura biləcək təhlükələrin və risklərin qarşısının alınmasına yönələn fəaliyyəti ön plana çəkir;
• İş yerlərində və istehsalat sahələrində ən müasir, təhlükəsiz texnika və texnologiyaların tətbiqinə nail olmağa çalışır;
• Əməyin mühafizəsi və texniki təhlükəsizliyə dair Azərbaycan Respublikası qanunlarının, qaydalarının və digər normativ hüquqi aktların tələblərini rəhbər tutaraq icrasını təmin edir;
• Baş vermiş bütün hadisələri tədqiq və təhlil edir, onların bir daha təkrarlanmaması üçün qabaqlayıcı tədbirlərin görülməsini və bu barədə işçi heyətin təlimatlandırılmasını və məlumatlandırılmasını həyata keçirir;
• Müvafiq mümkün fövqəladə hallara dair qabaqlayıcı tədbir prosedurları işləyib hazırlayır;
• Əməkdaşların əməyin mühafizəsi və texniki təhlükəsizlik sahəsi üzrə biliklərinin artırılması istiqamətində mütəmadi olaraq maarifləndirici tədbirlər həyata keçirir;

İşçilərin mümkün xəsarətlər almasının və səhhətinin pisləşməsinin qarşısının alınması və eyni zamanda əməyin təhlükəsizliyinin təmin edilməsi sisteminin və bu sahədə fəaliyyət göstəricilərinin daimi təkmilləşdirilməsi üzrə sistemli fəaliyyət göstərir.

“AzerGold” QSC-nin işçi heyyətinin iş yerində spirtli içkilərdən, narkotik vasitələrdən, psixotrop maddələrdən istifadə etməsi və qumar oyunları Cəmiyyətin və əməkdaşların iş keyfiyyətini azaldır, həmçinin nüfuzuna xələl gətirir.

Bu məqsədlə Cəmiyyətin rəhbərliyi bəyan edir:

• Vəzifəsindən və səlahiyyətindən asılı olmayaraq Cəmiyyətin struktur bölmələrində, iş yerlərində spirtli içkilərin, narkotik vasitələrin və psixotrop maddələrin istifadəsi, saxlanılması, paylanılması, daşınması və satışı QADAĞANDIR və belə halların baş verməsi əməkdaşların işdən azad edilməsinə əsas verir;
• Reseptlə buraxılan narkotik tərkibli dərman preparatlarının struktur bölmənin rəhbərinə, həmçinin Cəmiyyətin sağlamlığın qorunması və əməyin təhlükəsizliyini təmin edən struktur bölməsinin rəhbərinə məlumat verilmədən istifadəsi, saxlanılması və paylanılması QADAĞANDIR;
• İşçinin spirtli içkilər, narkotik vasitələr, psixotrop və digər zəhərli maddələr qəbul edərək işə gəlməsi, habelə iş yerində spirtli içkilər, narkotik vasitələr, psixotrop və digər zəhərli maddələr qəbul etməsi QADAĞANDIR;
• İşçinin vəzifəsindən və səlahiyyətindən asılı olmayaraq iş yerində narkotik vasitələrin və psixotrop maddələrin təsiri altında olması aşkar olunduqda, nəzərdə tutulmuş Azərbaycan Respublikasının qanunvericiliyinin və Cəmiyyətin daxili nizam-intizam qaydalarının tələblərinə, habelə Azərbaycan Respublikasının Əmək Məcəlləsinin müvafiq maddələrinə əsasən əmək müqaviləsinə xitam verilməsi və hüquqi müstəvidə ölçü götürülməsi üçün işçinin müvafiq orqanlara təhvil verilməsinə əsasdır;
• Cəmiyyətin struktur bölmələrinin rəhbərləri, habelə Cəmiyyətin sağlamlığın qorunması və əməyin təhlükəsizliyini təmin edən struktur bölməsinin rəhbəri zəruri hesab etdiyi hallarda işçi heyətinin spirtli içkilərə, narkotik vasitələrə və psixotrop maddələrə qarşı testdən keçirilməsinə səlahiyyətlidir;
• İşçi heyət arasında mübahisələrin yaranmasına və bununla da iş prosesinin ahəngdarlığının pozulmasına səbəb ola biləcəyindən bütün qumar oyunları QADAĞANDIR.

Cəmiyyətin işçi heyəti yuxarıda qeyd olunan tələbləri pozduqda, işçinin Cəmiyyətdə iş fəaliyyəti aparması QADAĞANDIR.

          “AzerGold” QSC-nin (bundan sonra “Cəmiyyət”) “Korrupsiyaya qarşı mübarizəyə dair” hazırkı siyasət (bundan sonra “Siyasət”) ilə Cəmiyyət öz fəaliyyətində korrupsiyanın qəbul edilməməsi və korrupsiyaya qarşı mübarizə üzrə mədəniyyət səviyyəsinin artırılması, işgüzar nüfuzun dəstəklənməsi və fəaliyyətin açıqlıq və şəffaflığının təmin edilməsinə riayət edir. Bununla, Cəmiyyət işgüzar fəaliyyətin yüksək etik standartlarına sadiqliyini əks etdirilməsi və fəaliyyətində korrupsiya risklərinin minimuma endirilməsi üzrə tədbirlərin həyata keçirilməsinə çalışır.

Siyasətin məqsədi və əhatə dairəsi

         Hazırkı Siyasət ilə Cəmiyyət öz fəaliyyətində korrupsiyaya qarşı mübarizə ilə bağlı hər hansı hüquqpozmalara yol verilməməsini, sosial ədalətin, insan və vətəndaşın konstitusional hüquq və azadlıqlarının müdafiə olunmasını, bu sahədə dövlətin və Cəmiyyətin maraqlarının qorunmasını, Cəmiyyətin fəaliyyətinin qanuniliyinin, şəffaflığının və səmərəliliyinin təmin edilməsini, habelə bu Siyasət üzrə müddəaların, tutduğu vəzifədən asılı olmayaraq, Cəmiyyətin bütün rəhbər və işçi heyəti tərəfindən mütləq icra olunmasını və şəxsi maraqların Cəmiyyətin fəaliyyətinə qarşı istifadə edilməməsini əsas götürür.

Hazırkı Siyasətin tələblərinin əhatə dairəsinə Cəmiyyətə aidiyyəti olan şəxslər, habelə Cəmiyyətin rəhbərliyi və işçilərinin yaxın qohumları daxil edilir.

Tətbiq edilən korrupsiyaya qarşı mübarizə qanunvericiliyi, Cəmiyyətdaxili siyasət və prosedurları, habelə beynəlxalq standartlardan birbaşa irəli gələn hazırkı Siyasətin başlıca prinsip və tələbləri Cəmiyyətdaxili vəzifəsindən asılı olmayaraq bütün işçi heyətinə və qarşı tərəflərə, o cümlədən təchizatçılara, vasitəçilərə, məsləhətçilərə, digər üçüncü şəxslərə, Cəmiyyətin idarələrinə, nümayəndəliklərinə, filiallarına və törəmə cəmiyyətlərinə şamil edilir.

Siyasətin formalaşmasının prinsipləri

         “Korrupsiyaya qarşı mübarizə haqqında” 01.01.2005-ci il tarixində qüvvəyə minmiş 580-IIQ saylı Azərbaycan Respublikasının Qanunu, İSO 37001 "Antikorrupsiya idarəetmə sistemləri" standartı (Anti-Bribery Management Systems), İqtisadi Əməkdaşlıq və İnkişaf Təşkilatının “Korrupsiyaya qarşı mübarizə üzrə İstanbul Fəaliyyət Planının Dördüncü Monitorinq Mərhələsi: Azərbaycanda Antikorrupsiya İslahatları” (“OECD Fourth Round of Monitoring of the Istanbul Anti-Corruption Action Plan: Anti-Corruption Reforms in Azerbaijan”) İqtisadi Əməkdaşlıq və İnkişaf Təşkilatının “Xarici vəzifəli şəxslərin beynəlxalq biznes əməliyyatlarında rüşvətxorluğa qarşı mübarizə haqqında Konvensiyası” (“OECD Convention on combating bribery of foreign public officials in international business transactions”) və bu sahadə digər müvafiq qanunvericiliyin tələblərinə əməl etmək üçün Cəmiyyət bu Siyasəti həyata keçirir.

          Hazırkı Siyasətin tələblərindən irəli gələn korrupsiyaya qarşı mübarizə çərçivəsində hüquqpozmaların qarşısının alınması üzrə tədbirlərin idarəedilməsi, pozuntular haqqında məlumatlandırma sistemi, korrupsiya qarşı qanunvericiliyin pozulmasına görə məsuliyyət üzrə prinsiplər və mexanizmlər, habelə digər aidiyyətı müddəalar Cəmiyyətdaxili müvafiq qaydalarda öz əksini tapır.

          Korrupsiya fəaliyyətinin qəbul edilməməsini, korrupsiyaya qarşı mübarizə üzrə mədəniyyət səviyyəsinin artırılmasını, işgüzar nüfuzun dəstəklənməsini və fəaliyyətin açıqlığının təmin edilməsini Cəmiyyət bütün rəhbər və işçi heyətindən tələb edir.

          Cəmiyyətin hər bir işçisi Cəmiyyətdaxili işgüzar fəaliyyətlərinin həyata keçirilməsi əsnasında, habelə dövlət orqanları, rəsmi şəxslər, ictimai qurumlar və onların nümayəndələri, siyasi xadimlər, müştərilər, təchizatçılar, qarşı tərəflər və digər şəxslərlə qarşılıqlı əlaqə zamanı hər hansı növ və təzahürdə olan korrupsiyanın qəbul edilməməsi prinsipinə riayət edir. Cəmiyyətdə korrupsiya ilə əlaqədar hər hansı hüquqpozmalar qadağan edilir.

          Korrupsiya riskinin azaldılması və tətbiq edilən korrupsiyaya qarşı qanunvericiliyin tələblərinə uyğunluğun təmin edilməsi məqsədilə Cəmiyyətdə müntəzəm qaydada maliyyə-təsərrüfat fəaliyyətinin xarici auditi və daxili nəzarət sisteminin mütəmadi qiymətləndirilməsi aparılır, tətbiq edilən qanunvericiliyin və Cəmiyyətdaxili sənədlərin tələblərinin yerinə yetirilməsinə nəzarət həyata keçirilir.

          Hazırkı Siyasəti ilə Cəmiyyət bəyan edir ki, Cəmiyyətin Nizamnaməsində qeyd edilmiş əsas məqsədlərinə nail olması, rüşvətin qadağan edilməsi, müvafiq qüvvədə olan antikorrupsiya qanunvericiliyinə riayət edilməsi, korrupsiya sahəsində pozuntular haqqında məlumatların konfidensial şəkildə təqdim edilməsi üzrə şərait yaradılması üçün bütün lazımı tədbirlər həyata keçirilir.

          Cəmiyyət hazırkı Siyasətin effektivliyinin daim monitorinqini aparır, onun kifayətliliyi, mütənasibliyi və aktuallığını qiymətləndirir, eləcə də nəzarət mühitinin nöqsanları əsasında və / və ya tətbiq edilən korrupsiyaya qarşı qanunvericilikdə və aparıcı beynəlxalq təcrübədə dəyişikliklərə əsaslanaraq onu təkmilləşdirir.

          Korrupsiyaya qarşı mübarizəyə dair qanunvericiliyin və Cəmiyyətdaxili sənədlərin tələblərinə uyğunluğun təmin edilməsinə və tətbiqinə nəzarət edən Cəmiyyətin müvafiq 

struktur bölməsi öz əsasnaməsi ilə müəyyən edilmiş səlahiyyətlər çərçivəsində fəaliyyətini həyata keçirdir və bu sahədə araşdırmalar zamanı Cəmiyyətin rəhbərliyi tərəfindən müstəqilliyi qorunur.

          Cəmiyyətin bütün işçiləri öz vəzifə borclarının yerinə yetirilməsi çərçivəsində hazırkı Siyasət və Azərbaycan Respublikasının qüvvədə olan müvafiq qanunvericiliyi ilə müəyyən edilmiş korrupsiyanın qarşısının alması üzrə tələblərə riayət edilməməsinə görə məsuliyyət daşıyırlar.

Yekun müddəalar

          Hazırkı Siyasət Cəmiyyətin Nizamnaməsi ilə müəyyən edilmiş təsdiqlənmə prosesini keçdikdən və Cəmiyyətin İdarə Heyətinin Sədrinin müvafiq əmri ilə təsdiqləndiyi tarixdən etibarən qüvvəyə minir. Siyasətə hər hansı dəyişiklik və / və ya əlavələr, aidiyyətı şöbələrin rəyi alımaqla, Cəmiyyətin İdarə Heyətinin Sədri tərəfindən müvafiq əmr və imza ilə təsdiq edildikdən sonra qüvvəyə minir.

          Siyasət ilə nəzərdə tutulmamış hər hansı hadisənin həlli müvafiq sahədə qüvvədə olan yerli qanunvericiliyin tələblərinə əsasən tənzimlənir.

“AzerGold” Qapalı Səhmdar Cəmiyyəti (bundan sonra “Cəmiyyət”) əlvan filiz yataqlarının öyrənilməsi, kəşfiyyatı, işlənilməsi və idarə olunması üzrə ixtisaslaşmış bir şirkət olaraq dağ-mədən fəaliyyətinin ətraf mühit, hasilat ərazilərində yaşayan yerli əhali və icmalara habelə onların ayrılmaz hüquqlarına göstərə biləcəyi təsir haqqında məlumatlıdır və bu təsiri Sosial Məsuliyyət konsepsiyası çərçivəsində ədalətli və hərtərəfli şəkildə tənzimləməyə çalışır. Sosial Təsir və Məsuliyyət üzrə Siyasət (bundan sonra “STMS”) sənədi Cəmiyyətin Sosial Məsuliyyət üzrə konsepsiyasının bir qoludur. Bu Siyasət dağ-mədən fəaliyyəti üzrə layihələrin həyata keçirilməsi zamanı yarana biləcək sosial nəticələrin müəyyənləşdirilməsi və ədalətli şəkildə əhatə edilməsi üzrə Cəmiyyətin ilkin hədəflərini müəyyən edir.

Bu Siyasətin hazırlanması zamanı milli qanunvericiliyin ətraf mühitin mühafizəsi, sosial müdafiə, əmək münasibətləri və digər əlaqəli sahələr üzrə tələbləri əsas götürülmüşdür. Həmçinin sosial təsir və məsuliyyət üzrə ən yaxşı beynəlxalq təcrübə, habelə Ekvador Prinsipləri, Dünya Bankının ətraf mühitin mühafizəsi və sosial əməliyyat Siyasətləri, BMT-nin Transmilli və digər kommersiya təşkilatlarının insan hüquqlarına münasibətdə məsuliyyətinə dair Normaların tələbləri nəzərə alınmışdır.

Siyasətin məqsədi və əhatə dairəsi

Sosial təsir və məsuliyyət üzrə Siyasət Cəmiyyətin və habelə onun idarələri, filialları, törəmə cəmiyyətlərinin fəaliyyətinə tətbiq edilir. Həmçinin əlvan filiz yataqlarının öyrənilməsi, kəşfiyyatı, işlənilməsi və idarəçiliyi üzrə ortaq layihələrin icrası zamanı, Cəmiyyətin podratçıları, subpodratçıları və digər işgüzar partnyorları da öz fəaliyyətlərini bu Siyasətin tələblərini və hədəflərini nəzərə almaqla qurmalıdırlar.       

Sosial təsir və məsuliyyət üzrə Siyasətin əsas məqsədləri aşağıdakılardır:

• Əlvan filiz yataqlarının kəşfiyyatı, işlənilməsi və idarə olunmasına yönəlmiş dağ-mədən fəaliyyətinin həyata keçirilməsi zamanı yarana biləcək sosial nəticələri müəyyənləşdirmək və əhatə etmək;
• Filiz yataqlarının yerləşdiyi regionlara xüsusi diqqət ayırmaqla, ümumilikdə ölkə üzrə sosial-iqtisadi inkişafa töhfələr vermək;
• Cəmiyyətin fəaliyyətini yerli əhalinin/icmanın ehtiyacları nəzərə alınmaqla, dayanıqlı inkişaf konsepsiyası çərçivəsində qurmaq və təkmilləşdirmək;
• Dağ-mədən sənayesində çalışan işçilərin sosial və əmək hüquqlarının qorunmasını təmin etmək;
• Dağ-mədən sənayesinin birbaşa sosial və ekoloji təsirlər yaratdığı regionlarda gender balansının təmin edilməsinə dəstək vermək.

Cəmiyyətin Sosial Təsir və Məsuliyyət üzrə Siyasəti yuxarıda qeyd olunan məqsədlər daxil olmaqla, əsasən dörd prioritet sahəni əhatə edir. Bu sahələr,

• Yerli əhali və icmalar
• Əlverişli əmək şəraiti və insan hüquqları
• Ətraf mühitin mühafizəsi
• Gender balansının qorunmasına dəstəkdən ibarətdir.

Yerli əhali və icmalar

Yerli əhali və icmalarla bağlı Cəmiyyət öz siyasətini aşağıdakı hədəflər üzrə qurur:

• Əlvan filiz yataqlarının kəşfiyyatı, işlənilməsi və idarə olunması üzrə layihələrin planlaşdırılması və icrası zamanı, həmçinin Cəmiyyətin fəaliyyətinin bütün digər sferalarında milli qanunvericiliyin tələblərinə qəti şəkildə əməl olunmasını təmin edir;
• Dağ-mədən fəaliyyəti ilə bağlı yerli əhali və icmaların məruz qala biləcəyi mənfi sosial, iqtisadi və ekoloji təsirləri müəyyənləşdirir və bu təsirləri əhatə edən xüsusiləşmiş layihələr həyata keçirir;
• Sosial infrastrukturun qurulmasında və inkişaf etdirilməsində iştirak edir;
• Arxeoloji və mədəni irsin qorunması üzrə qanunvericilikdən irəli gələn vəzifələrini yerinə yetirir, habelə bu istiqamətdə yerli əhali və icmalarla fəal əməkdaşlıq edir;
• Torpaq sahələrinin və infrastruktur itkiləri ilə bağlı qanunvericilikdə nəzərdə tutulmuş kompensasiyaları ödəyir;
• Yeni iş yerlərinin açılması və bu iş yerlərinin yerli və əhali icma üzvlərinə təklif edilməsi üzrə əmək qanunvericiliyi və öz səlahiyyətləri çərçivəsində bütün lazımi tədbirləri görür.

Əlverişli əmək şəraiti və insan hüquqları

Əlverişli əmək şəraiti və insan hüquqları ilə bağlı Cəmiyyət öz siyasətini aşağıdakı hədəflər üzrə qurur:

• Əlvan filiz yataqlarının kəşfiyyatı, işlənilməsi və idarə olunması üzrə layihələrin planlaşdırılması və icrası zamanı, həmçinin Cəmiyyətin fəaliyyətinin bütün digər sferalarında məcburi əmək və uşaq əməyinin qadağan olunması üzrə milli qanunvericiliyin tələblərinə əməl olunmasını təmin edir;

• Əməyin təhlükəsizliyi və işçilərin sağlamlığının qorunmasıüzrə milli qanunvericiliyin tələblərinə əməl edir və bu istiqamətdə beynəlxalq standartlar və ən yaxşı təcrübələr nəzərə alınmaqla sistemli tədbirlər həyata keçirir;
• İşçilərin peşəkar qabiliyyətinin artırılması, həmçinin yerli əhali və icma nümayəndələri arasında gənclərin və həssas qrupların peşə təhsili ilə təmin edilməsi üzrə öz imkanları daxilində müxtəlif layihələr həyata keçirir;
• İş yerlərində ədalətli əməkhaqqı sisteminin yaradılması və bütün növ ayrı-seçkiliyin aradan qaldırılması üzrə davamlı səylər göstərir.

Ətraf mühitin mühafizəsi

Dağ-mədən fəaliyyəti ətraf mühitə müxtəlif aspektlərdə təsirlər göstərir ki, bu aspektlər də Cəmiyyət tərəfindən qəbul edilmiş bir çox daxili sənədlərlə, o cümlədən Ekoloji Siyasət sənədi ilə tənzimlənir. Ümumilikdə Sosial Təsir və Məsuliyyət Siyasətinin tərkib hissəsi olaraq Cəmiyyət:

• Ətraf mühit üzrə idarəetmə sisteminin tələblərini öz fəaliyyətinə tətbiq edir və habelə bu tətbiqin təkmilləşdirilməsi üçün davamlı nəzarət və daxili islahatlar həyata keçirir;
• Təbii resurslardan, habelə enerji mənbələrindən istifadə zamanı əsaslı qənaətə imkan verən ən yaxşı təcrübələrin, ekoloji təmiz və yeni texnologiyaların tətbiqinə çalışır;
• Əlvan filiz yataqlarının kəşfiyyatı, işlənilməsi və idarə olunması üzrə təşviqedici layihələr və tədbirlər həyata keçirir.

Gender balansının qorunmasına dəstək

Dağ-mədən sənayesinin birbaşa sosial, iqtisadi və ekoloji təsirlər yaratdığı regionlarda gender balansının təmin edilməsinə Cəmiyyət aşağıdakı istiqamətdə fəaliyyət göstərir:

• Əlvan filiz yataqlarının kəşfiyyatı, işlənilməsi və idarə olunması, habelə bu istiqamətlərdə layihələrin icrası zamanı yerli əhali və icmaların qadın üzvlərinin məruz qaldığı sosial riskləri müəyyənləşdirir və bu risklərin azaldılması\aradan qaldırılması üçün davamlı səylər göstərir;
• İşçilər arasında istənilən növ ayrı-seçkiliyi, həmçinin cinsi zəmində ayrı-seçkiliyi yolverilməz hesab edir və əməyin ödənilməsi, həmçinin əmək münasibətlərinin digər sahələrində ayrı-seçkiliyə yol verilməməsini təmin edir;
• Peşə təhsili və müxtəlif sosial layihələr vasitəsilə qadınların ictimai həyatda və regionların sosial-iqtisadi inkişafında rolunu gücləndirmək məqsədilə silsilə tədbirlər həyata keçirir.

Yekun müddəalar

Bu Siyasət Cəmiyyətin İdarə Heyətinin sədri tərəfindən xüsusi əmr və imza ilə təsdiqləndiyi andan qüvvəyə minir.

Siyasətə düzəliş və əlavələr yalnız aidiyyəti şöbələrin təklifi əsasında Korporativ Sosial Məsuliyyət Komitəsinin rəyi alınmaqla təklif edilə bilər.

Siyasətə düzəliş və əlavələr yalnız Cəmiyyətin İdarə Heyətinin sədri tərəfindən müvafiq əmr və imza ilə təsdiq edildikdən sonra qüvvəyə minir.