Çovdar İnteqrəolunmuş Regional Emal Sahəsi (ÇİRES) Daşkəsən rayonunun Çovdar kəndi yaxınlığında yerləşir. Müəssisə 2020-ci ildə Çovdar Filiz Emalı Sahəsinin bazasında yaradılıb. Məqsəd “Çovdar” qızıl mədəni və cinahlarda yerləşən “Ağyoxuş” yataqlar qrupu, “Mərəh” və “Tülallar” qızıl yataqlarından hasil edilən qiymətli metal filizlərinin emalının mərkəzləşdirilmiş qaydada həyata keçirilməsidir.
ÇİRES-də maksimum effektliliyin təmin edilməsi üçün aşağı zənginlik dərəcəli oksid və tranzit filizlərinin Topa qələviləşdirmə (HPL – Heap Leach Pad), orta və yuxarı zənginlik dərəcəli oksid, tranzit və sulfid filizlərinin isə Çəndə qələviləşdirmə (CIL – Carbon in Leach) texnologiyası ilə emalı həyata keçirilir.
Topa qələviləşdirmə texnologiyası
“AzerGold” QSC-nin 2017-ci ildən istismar işlərinə başladığı “Çovdar” qızıl yatağının oksid fazası çərçivəsində qiymətli metal filizləri Topa qələviləşdirmə texnologiyası (HPL) ilə emal edilir. HLP texnologiyası ilə filizlərin mineraloji tərkibindən və metallurji xüsusiyyətlərindən asılı olaraq qızılın 75%-dək alınması təmin edilir. Zavod illik 1.4 milyon filizüyütmə potensialına malikdir. Emal müddəti isə orta hesabla 90 gündür.
Çəndə qələviləşdirmə texnologiyası
ÇİRES-də Çəndə qələviləşdirmə texnologiyası (CIL) ilə fəaliyyət göstərən zavod 2024-cü ildə tam rejimdə istifadəyə verilib. Müəssisədə “Çovdar” qızıl yatağının sulfid fazası çərçivəsində qiymətli metal filizlərinin emalı yüksək səmərə ilə həyata keçirilir. CIL texnologiyası ilə filizlərin mineraloji tərkibindən və metallurji xüsusiyyətlərindən asılı olaraq qızılın 90%-dək alınması təmin olunur. Zavod illik 1.1 milyon ton filizüyütmə potensialına malikdir. Emal müddəti isə ortalama 48 saatdır.
