“AzerGold” QSC “Qlobal iqlim dəyişikliyi və insan sağlamlığı” mövzusunda keçirilən konfransda iştirak edib

“AzerGold” QSC ADA Universitetində keçirilən “Qlobal iqlim dəyişikliyi və insan sağlamlığı: Təsirlərin azaldılmasında davamlı həllər və innovativ təşəbbüslər” mövzusunda keçirilən konfransda təmsil olunub.

Konfrans “Regional İnkişaf” İctimai Birliyinin təşkilatçılığı, Elm və Təhsil Nazirliyi, Ekologiya və Təbii Sərvətlər Nazirliyi, Kənd Təsərrüfatı Nazirliyi, Ailə, Qadın və Uşaq Problemləri üzrə Dövlət Komitəsi, “AzerGold” QSC, Azərbaycan Sənaye Korporasiyası və ADA Universiteti və digər qurum və təşkilatların dəstəyi ilə baş tutub.

Açılış mərasimində konfrans barədə ətraflı məlumat verilib, əsas məqsədin məktəbliləri iqlim dəyişikliyinin təsirləri barədə maarifləndirmək, onları bu problemin həllində fəal iştiraka və sağlam gələcək naminə innovativ ideyalar və həllər irəli sürməyə təşviq etmək məqsədi daşıdığı bildirilib.

Daha sonra konfrans çərçivəsində “Qlobal iqlim dəyişikliyinin uşaqların sağlamlığına təsirləri” mövzusunda məktəblilər arasında keçirilmiş ümumrespublika müsabiqəsinin qalib komandaları mükafatlandırılıb. Müsabiqəyə təqdim edilən 53 layihə arasından Təşkilat Komitəsi tərəfindən seçilmiş, problemin həllinə ən yaradıcı və innovativ yanaşma irəli sürmüş 5 məktəb komandası mükafatlandırılıb.

Panel müzakirələri ilə davam edən konfransda “Dayanıqlı kənd təsərrüfatı və qida təhlükəsizliyinin qorunmasında innovativ həllər”, “Biomüxtəlifliyin və ekosistemin dayanıqlığının təmin edilməsində yeni çağırışlar” mövzuları ətrafında müzakirələr aparılıb, mütəxəssislər tərəfindən məktəblilərin sualları cavablandırılıb.

Layihənin davamı olaraq ekspertlərin və seçilmiş “uşaq iqlim səfirləri”nin iştirakı ilə paytaxt Bakı və bölgələrdə yerləşən orta məktəblərdə maarifləndirici sessiyalar və təlimlərin təşkil olunması, məktəblilərin iştirakı ilə müxtəlif ekoloji aksiyaların keçirilməsi nəzərdə tutulub.