“AzerGold” QSC Özbəkistanda sərgi və işgüzar görüşlərdə iştirak edib

“AzerGold” Qapalı Səhmdar Cəmiyyətinin (QSC) nümayəndə heyəti Azərbaycan Respublikası Prezidentinin Özbəkistan Respublikasına rəsmi səfəri çərçivəsində Daşkənd şəhərində keçirilən silsilə tədbir və işgüzar görüşlərdə iştirak edib.

Belə ki, “AzerGold” QSC dövlət başçılarının hər iki ölkənin işgüzar dairələrinin nümayəndələri ilə görüşü, Özbəkistan-Azərbaycan biznes forumunda təmsil olunub, iki ölkə arasında investisiya tərəfdaşlığının gücləndirilməsi, yeni birgə layihələrin gerçəkləşdirilməsi imkanları ilə bağlı müzakirələrdə iştirak edib.

Bundan başqa, “AzerGold” QSC və Özbəkistanın Dağ-Mədən İşi və Geologiya Nazirliyi arasında görüş keçirilib. Görüşdə 2023-cü ilin 24 fevral tarixində tərəflər arasında imzalanmış Anlaşma və Razılaşma Memorandumuna uyğun olaraq geologiya və mədənçilik sahəsində birgə əməkdaşlığın qurulması, Özbəkistan, Azərbaycan və 3-cü ölkələrdə birgə layihələrin işlənməsi istiqamətində mövcud təkliflər əsasında fikir mübadiləsi aparılıb. Tərəflər təmasların artırılması, fəaliyyətin təşkili üzrə konkret addımların atılması ilə bağlı ilkin razılığa gəliblər.

Həmçinin “AzerGold” QSC Azərbaycan iqtisadiyyatına həsr olunmuş “İqtisadiyyatın əsas istiqamətləri – ümumi rifaha doğru addım” adlı sərgidə təmsil olunub. 2 gün davam edən sərgidə QSC-nin qızıl və gümüş sikkə, eləcə də qızıl külçə kolleksiyaları nümayiş etdirilib. Nəfis tərtibatda dizayn edilmiş, incə naxışlarla zərb edilmiş 999.9 əyarlı məhsullar sərgini ziyarət edən Azərbaycan və Özbəkistanın rəsmi şəxsləri, işgüzar dairələri və yerli vətəndaşların böyük marağına səbəb olub.